Luke 3

Ioaanes a Tena Baapitaaiso i warawaai

(Mt 3:1-12; Mk 1:1-8; Io 1:19-28)

1Baa i wenoina ma lima na kilaala na naagagon anun Kaaisaar Tiberio, Pontio Pilaato a ngaala na mukmuga i naagagon u ra papaar Iudaia, ma Erodes i mukmuga u ra papaar Gaalilaia, ma tenalik Pilipo i mukmuga u ra ru papaar Ituraaia ma Traakoniti, ma Lisaanio i mukmuga u ra papaar Aabilene 2ma Aanaas ma Kaaiapaas diaar lo a pinapaam na mukmuga na tena wetabaar karom God. U ra kilaala maa a pirpir anun God i waan paat karom Ioaanes, natun Saakaria baa i ki inaanga u ra bil na wanua. 3Ma i waan u ra kum wanua raap marawaai u ra daanim Ioridaan, i warawaai naa a taara diat a nukpuku ma din baapitaaiso diat, ma God in una wa anundiat kum aakaina mangamangaan. 4Welaar ma di aa timu taai u ra buk anu ra propet Aaisaia naa,

“In ingaan raa i wewataai u ra bil na wanua lenbi,
‘Muaat a paam aara aakapi anu ra Tadaaru,
muaat a paam kado anuna kum aakapi.
5A kum maale raap din punang diat
ma a kum tiltil raap ma ra kum taangaai din kil kado diat.
A kum aakapi baa i pagol din wakadoi,
ma a kum wanua i tungtung, din punang kadoi.
6Ma a taara raap diat a babo a warwalaaun anun God.’” ^a
7A kor na taara diat waan paat karom Ioaanes kupi in baapitaaiso diat. Ma i piri taan diat naa, “Aai, muaat a kum natu ra kum wui! Woi maa i piri naa muaat a kalaa ino ko ra naagagon na binabaalu anun God baa in waan paat? 8Muaat a paam a kum utnaa baa in wapuaanai naa muaat aa nukpuku. Ma koku muaat nuki naa God pa in naagagon muaat maa kabina muaat a wuna taara anun Aabaraam. Iaau piri taa muaat naa, God i pet laar paai kupi in paam apaat paa a wuna taara anun Aabaraam ko ra kum waat bi. 9Di aa ung taa a naawa naa ra kum kapkabina diwaai, ma a kum diwaai raap baa pa diat wa ta koina waindiat, din bur wa diat, ma din ong ta diat u ra nguan.”

10A kor na taara diat tiri naa, “Aawa maa miaat a paami?” 11I baalu diat naa, “Ia baa anuna ta ruina maalu na minong, in taar taa tin taan te baa pa nuna tina maalu na minong, lenkaai maa u ra utnaa na winangaan.” 12Ma raa kum tena lolo tatakom diat waan paat kupi in baapitaaiso diat. Ma diat tiri naa, “Tena wawer, aawa maa miaat a paami?” 13Ma i baalu diat naa, “Koku muaat lo a tatakom i ngaala taa ra toto di aa naagagon taai.” 14Ma raa kum tena wineium diat tiri naa, “Ma miaat, aawa maa miaat a paami?” Ma i baalu diat naa, “Koku muaat pet na kaankaan biaa paa ku a maani ko ra taara, ma koku muaat wetakun warwaruga, muaat a gaaia paa ku anumuaat wedok.”

15A taara diat kiki walaang kup Kaarisito. Baa diat walangoro Ioaanes, diat nuki naa kanaapi Kaarisito ma mi ia waan paat. 16Ma Ioaanes i piri taan diat raap naa, “Iaau baapitaaiso muaat ma ra palaa, iaku ia baa i ngaala taang in waan paat, in baapitaaiso muaat ma ra Takado na Nion ma ra nguan. Ma iaau, iaau kinalik aakit taana. 17I paam paa anuna saaol u ra limaana kupi in ong weraana a panina wit ko ra wit mulu. Baa ia wali raap taai in ung ungaai anuna wit u ra nuna ruma na wit, ma in tun wa a kum panpanina u ra nguan baa pa in maat.” 18Baa Ioaanes i warawaai karom diat ma ra Koina Wewapua i wadekdek diat ma ra mongoro na pirpir kupi diat a puku anundiat mangamangaan.

19Ma Ioaanes i pirpir dekdek karom Erodes a mukmuga, kabina maa i taulaa balet ma Erodiaa, a tabuan anun tenalik. Ma i pirpir dekdek u ra kum aakaina utnaa raap kaai baa Erodes ia paam taai. 20Ma Erodes i paam balet ku aakaina mangamangaan baa i waruk taa Ioaanes u ra ruma na karabus.

Ioaanes i baapitaaiso Iesu

(Mt 3:13-17; Mk 1:9-11)

21Baa Ioaanes i baapitaaiso a taara raap, i baapitaaiso kaai Iesu. Ma baa i aaraaring, a maawa i tapaapa, 22ma a Takado na Nion i waan pari, i ung a panina welaar ma ra ina buna, ma i ki taau nate un Iesu. Ma in ingaan raa taanginaanga u ra maawa i piri lenbi, “Ui Natunglik, a naat na wakwakaak, iaau gaaia aakit un ui.”

A niluluk na wuna taara anun Iesu

(Mt 1:1-17)

23Iesu i turpaa anuna pinapaam baa i 30 duk anuna kilaala na lalaaun. Ia a natun Iosep, a nuknuki ra taara ku lenmaa.

• Iosep a natun Eli,

24

Eli a natun Maataat,

Maataat a natun Lewi,

Lewi a natun Melki,

Melki a natun Iaanaa,

Iaanaa a natun Iosep,

25

Iosep a natun Maatatio,

Maatatio a natun Aamos,

Aamos a natun Naaum,

Naaum a natun Esli,

Esli a natun Naagaai,

26

Naagaai a natun Maat,

Maat a natun Maatatio,

Maatatio a natun Semein,

Semein a natun Iosek,

Iosek a natun Iodaa,

27

Iodaa a natun Ioaanaan,

Ioaanaan a natun Resaa,

Resaa a natun Serubaabel,

Serubaabel a natun Salaatiel,

Salaatiel a natun Neri,

28

Neri a natun Melki,

Melki a natun Aadi,

Aadi a natun Kosaam,

Kosaam a natun Elmaadaam,

Elmaadaam a natun Er,

29

Er a natun Iosua,

Iosua a natun Elieser,

Elieser a natun Iorim,

Iorim a natun Maataat,

Maataat a natun Lewi,

30

Lewi a natun Simion,

Simion a natun Iuda,

Iuda a natun Iosep,

Iosep a natun Ionaam,

Ionaam a natun Eliaakim,

31

Eliaakim a natun Melea,

Melea a natun Menaa,

Menaa a natun Maataataa,

Maataataa a natun Naataan,

Naataan a natun Dewid,

32

Dewid a natun Iese,

Iese a natun Obed,

Obed a natun Boaas,

Boaas a natun Saalmon,

Saalmon a natun Naason,

33

Naason a natun Aaminadaab,

Aaminadaab a natun Aadmin,

Aadmin a natun Aarni,

Aarni a natun Esrom,

Esrom a natun Peres,

Peres a natun Iuda,

34

Iuda a natun Iaakob,

Iaakob a natun Aaisaak,

Aaisaak a natun Aabaraam,

Aabaraam a natun Teraa,

Teraa a natun Naakor,

35

Naakor a natun Seruk,

Seruk a natun Raagaa,

Raagaa a natun Pelek,

Pelek a natun Eber,

Eber a natun Saalaa,

36

Saalaa a natun Kaainaan,

Kaainaan a natun Aapaakaad,

Aapaakaad a natun Sem,

Sem a natun Noaa,

Noaa a natun Laamek,

37

Laamek a natun Maatusaalaa,

Maatusaalaa a natun Enok,

Enok a natun Iaared,

Iaared a natun Maalelel,

Maalelel a natun Kaainaan,

38 Kaainaan a natun Enos, Enos a natun Set, Set a natun Aadaam, Aadaam a natun God.